AKU konfiskon 78 kg mish qengji dhe viçi në Krujë

Autoriteti Kombëtar i Ushqimit ka konfiskuar pasditen e djeshme një sasi prej 73 kg mish qengji dhe viçi në mungesë të certifikatës veterinare dhe për tregtim të tij jashtë çdo kushti higjieno-sanitar, përkatësisht në njësinë e tregtimit të mishit në rrugën e Spitalit në qytetin e Krujës.

Inspektorët e Drejtorisë Rajonale Durrës në bashkëpunim me inspektorët e Drejtorisë së Përgjithshme të Autoritetit Kombëtar të Ushqimit, kanë kryer inspektim në njësinë e tregtimit të mishit ne pronësi të shtetasit Indrit Seli, ku i janë gjendur 50 kg mishi qengji dhe 23 kg mish vici në mungesë të certifikatës veterinare, i pavulosur dhe tregtim të tij në kushte të rënda higjieno-sanitare.

Për këto shkelje të rënda ne bazë të legjislacionit në fuqi, inspektorët e AKU-së e kanë gjobitur me masën administrative me gjobë në vlerën e 150 mijë lekëve. Ndërkohë që po për të njëjtën njësi tregtimi në janar këtij viti, është marrë masë administrative me gjobë në vlerën e 100 mijë lekëve për tregtim jashtë kushteve higjieno-sanitare të produktit mish.

Autoriteti Kombëtar i Ushqimit me qëllim garantimin e sigurisë ushqimore, i bën thirrje konsumatorëve që të jenë të kujdesshëm në blerjen e produktit mish, duke kërkuar informacione në njësitë e tregtimit të mishit që të jetë i vulosur, i shoqëruar me certifikatë veterinare dhe që plotësojnë standardet që parashikon legjislacioni në fuqi.

Burimi: Gazeta-Shqip.com