A është uji i gazuar po aq i shëndetshëm sa ai i pagazuar?

Shumë njerëz pëlqejnë të pinë ujë të gazuar. Edhe pse është një zgjedhje më e mirë se lëngjet me sheqer dhe pijet e tjera që përmbajnë sasi të mëdha sheqeri, ekspertët paralajmërojnë se uji i gazuar duhet të konsumohet me masë

Për adhuruesit, uji i gazuar ofron një përvojë që uji i zakonshëm nuk mund ta bëjë: zhurma e flluskave kur hapni një shishe, therja në gojë kur pini, dhe nganjëherë një aromë e butë “natyrale”.

Uji i thjeshtë është i shkëlqyeshëm për hidratim, por “do të habiteshit sa njerëz nuk duan të pinë ujë të thjeshtë, sepse nuk u pëlqen shija”, thotë Anna Linge, dietologe e regjistruar në Qendrën Mjekësore Universitare në Uashington DC, duke shtuar se “shtimi i flluskave e bën atë më të pranueshëm”.

Dietologët pajtohen që uji i gazuar, i cili përfshin ujë të gazuar artificial, është po aq hidratues sa uji i zakonshëm, por uji i rubinetit ka një avantazh shtesë – ai përmban fluor, i cili ndihmon në parandalimin e dëmtimit të dhëmbëve, shkruan The New York Times.

Nëse përdorni ujë me fluor për larjen e dhëmbëve, për gatim dhe hidratim, lirisht mund të përfshini ujë të gazuar në dietën tuaj”, thotë Linge.

Por kini parasysh se uji i gazuar ka më shumë acidik se i zakonshmi.

Uji me flluska përmban dyoksid karbon, i cili shndërrohet në acid karbonik në kontakt me pështymën duke ulur pH në gojën tuaj.

Pijet që kanë një vlerë të ulët pH mund të jenë të dëmshme për dhëmbët, duke rritur mundësinë e kariesit. Sidoqoftë, duhet të theksohet se uji mineral është shumë më i shëndetshëm për dhëmbët sesa lëngjet e gazuara ose të frutave, siç tregohet nga rezultatet e një studimi të botuar në vitin 2016 në revistën e Shoqatës Amerikane të Dentarëve.

Disa prodhues shtojnë thartirë limoni në ujin e gazuar për të përmirësuar shijen, gjë që mund të rrisë nivelin e aciditetit. Një gjë e ngjashme do të ndodhë nëse shtoni vetë feta limoni ose limete në ujë. Pra, është e vështirë të dihet saktësisht se çfarë i shtohet ujit nëse si përbërës përmendet vetëm “aroma natyrale”.

Pak kërkime janë bërë mbi ujin e gazuar dhe pasojat që ai lë në dhëmbë. Megjithatë, sipas Dr. Brittany Seymour, docent në Departamentin e Stomatologjisë në Harvard dhe zëdhënëse e Shoqatës Amerikane të Stomatologjisë, “duhet të pini shumë ujë të gazuar në ditë për të bërë po aq dëm sa lëngjet e gazuara apo të frutave”.

Përfundim

Meqenëse uji i gazuar mund të jetë i dëmshëm për dhëmbët tuaj, pijeni atë më tepër për kënaqësi një herë në ditë, por mos lejoni që ai të bëhet burimi juaj kryesor i ujit, thotë Dr. Seymour.

Burimi: Telegrafi